पनवेल (प्रतिनिधी): पनवेल येथील नवीन दिवाणी न्यायाधीश न्यायालयीन इमारतीवर अतिरिक्त दोन मजल्यांच्या प्रत्यक्ष बांधकामास लवकरच सुरुवात होणार आहे. आमदार प्रशांत ठाकूर, बार कौन्सिल ऑफ महाराष्ट्र अँड गोवा अध्यक्ष ऍड. पारिजात पांडे यांच्या मार्गदर्शनाखाली व ऍड. मनोज भुजबळ यांच्या नेतृत्वाखाली पनवेल वकील संघटनेने केलेल्या सातत्यपूर्ण पाठपुराव्याला यश मिळाले असून या कामासाठी १० कोटी १६ लाख ५७ हजार ८९४ रुपये खर्च होणार आहे.पनवेल न्यायालयात सध्या एकूण १५ न्यायालये मंजूर आहेत. मात्र नवीन इमारतीमध्ये केवळ आठ कोर्ट हॉल उपलब्ध असल्याने उर्वरित न्यायालयांसाठी तात्पुरती व्यवस्था करावी लागत होती. वाढत्या कामकाजामुळे न्यायालयीन प्रक्रियेत अडथळे येत असल्याने अतिरिक्त मजल्यांची गरज आमदार प्रशांत ठाकूर यांनी मुख्यमंत्री देवेंद्र फडणवीस यांच्याकडे निकडीने मांडली होती. बार कौन्सिल अध्यक्ष ऍड. पारिजात पांडे आणि पनवेल वकील संघटनेचे अध्यक्ष ऍड. मनोज भुजबळ यांनीही सातत्याने पाठपुरावा केला.राज्य शासनाने या कामाला प्रशासकीय मान्यता दिल्यानंतर सार्वजनिक बांधकाम विभागामार्फत निविदा मागविण्यात आली. या निविदेत उल्हासनगर येथील रचना कन्स्ट्रक्शन कंपनीला ठेका देण्यात आला असून एक वर्षात हे काम पूर्ण करण्याचे लक्ष्य आहे. अतिरिक्त दोन मजल्यांमुळे न्यायालयीन प्रक्रिया अधिक सुलभ, सुटसुटीत आणि कार्यक्षम होणार आहे.
कोट
“पनवेल न्यायालयाच्या वाढत्या कामकाजाला न्याय देण्यासाठी अतिरिक्त मजल्यांची अत्यंत गरज होती. या कामाला येत्या महिन्यात सुरुवात होणार असून ते पनवेल वकील संघटनेच्या सातत्यपूर्ण पाठपुराव्याचे फलित आहे. आमदार प्रशांत ठाकूर आणि बार कौन्सिलचे अध्यक्ष ऍड. पारिजात पांडे यांच्या प्रभावी मार्गदर्शनामुळे हा महत्त्वाचा टप्पा गाठता आला. दोन नवीन मजल्यांमुळे न्यायालयीन प्रक्रिया अधिक सुलभ, सुटसुटीत होणार असून वकील, न्यायाधीश व पक्षकारांना दिलासा मिळणार आहे. यासाठी मुख्यमंत्री देवेंद्र फडणवीस, आमदार प्रशांत ठाकूर, ऍड. पारिजात पांडे आणि सर्व सहकाऱ्यांचे मनापासून आभार.”
— ऍड. मनोज भुजबळ, अध्यक्ष, पनवेल वकील संघटना
0 Comments