गणेशमूर्ती आगमन ते विसर्जनापर्यंत वाहतूक नियोजनाचा आदर्श; पनवेलकरांकडून पोलीस निरीक्षक सुभाष पुजारी यांचे कौतुक

पनवेल(प्रतिनिधी):गणेशोत्सवाच्या काळात पनवेल शहरातील वाहतूक सुरळीत ठेवण्यासाठी वाहतूक शाखेकडून करण्यात आलेल्या नियोजनाचे नागरिकांकडून कौतुक होत आहे. गणेशमूर्ती आगमनापासून ते विसर्जनापर्यंतच्या कालावधीत शहरात होणारी गर्दी आणि संभाव्य वाहतूक कोंडी लक्षात घेऊन वाहतूक व्यवस्थेचे नियोजन करण्यात आले.पोलीस उपायुक्त वाहतूक डॉ. राहुल खाडे व सहाय्यक पोलीस आयुक्त वाहतूक गावडे यांच्या मार्गदर्शनाखाली, सहाय्यक पोलीस आयुक्त पनवेल भुजबळ, पनवेल शहरचे वरिष्ठ पोलीस निरीक्षक बाळा कुंभार तसेच पनवेल महानगरपालिका प्रशासनाशी समन्वय साधून पोलीस निरीक्षक सुभाष पुजारी यांनी वाहतूक व्यवस्थेचे नियोजन केले. 

गणेशोत्सवाच्या काळात मोठ्या संख्येने नागरिक आणि भाविक शहरात दाखल होत असल्याने विविध ठिकाणी होणारी गर्दी लक्षात घेऊन वाहतूक सुरळीत ठेवण्यासाठी आवश्यक उपाययोजना करण्यात आल्या.गणेश विसर्जनाच्या दिवशी नागरिकांना वाहतुकीचा त्रास होऊ नये, यासाठी प्रत्यक्ष रस्त्यांवरील नियोजनासोबतच सोशल मीडियाच्या माध्यमातूनही नागरिकांमध्ये जनजागृती करण्यात आली. वाहतुकीतील बदल आणि मार्गांबाबतची माहिती सोशल मीडियाद्वारे नागरिकांपर्यंत पोहोचविण्यात आली. आगमनापासून विसर्जनापर्यंत करण्यात आलेल्या या नियोजनामुळे गणेशोत्सव काळातील वाहतूक व्यवस्थापनास मदत झाली असून, पोलीस निरीक्षक सुभाष पुजारी यांच्या कामाचे नागरिकांकडून कौतुक होत आहे.