प्रतिनिधी /पनवेल : खारघर येथे ई.एफ. ट्रस्टतर्फे आयोजित दुर्गापूजा २०२५ मोठ्या उत्साहात व भक्तिभावाने संपन्न झाली. सलग दुसऱ्या वर्षी आयोजित या उत्सवाला परिसरातील नागरिक व भाविकांनी मोठ्या संख्येने उपस्थित राहून पूजेची शोभा वाढवली. शष्ठीपासून विजया दशमीपर्यंत पाच दिवस देवी दुर्गेच्या विविध पूजा ,अर्चना, सांस्कृतिक कार्यक्रम, भजन-कीर्तन आणि पारंपरिक नृत्यांनी वातावरण भक्तिमय झाले. महाअष्टमी व महानवमीच्या दिवशी विशेष पूजेला मोठी गर्दी जमली. विजया दशमीच्या दिवशी झालेला सिंदूर खेळा आणि मूर्ती विसर्जन सोहळा भव्यतेने पार पडला. या सोहळ्याचे मुख्य आकर्षण ठरलेले डॉ. शिल्पा पाठक ठाकूर यांचे नेतृत्व व त्यांच्या संपूर्ण परिवारातील पती अभिनव ठाकूर, मुलगा एत्तान ठाकूर,भाऊ चेतन, डॉ. प्रीती , आई निशा पाठक यांचा संपूर्ण परिवाराचा सक्रिय सहभाग उल्लेखनीय राहिला. यांनी पूजेपासून भक्तांच्या स्वागतापर्यंत प्रत्येक टप्प्यात मनापासून सहभाग घेतला. त्यांच्या योगदानामुळे संपूर्ण उत्सवाला एक वेगळीच रंगत प्राप्त झाली. पूर्ण आयोजन यशस्वी पार पाडण्यासाठी ई.एफ. ट्रस्टच्या कार्यकर्त्यांनी अपार मेहनत घेतली.
खारघर परिसरातील अनेक नागरिकांनी मोठ्या संख्येने सहभाग घेतला. महिलांनी पारंपरिक पोशाख परिधान करून आरतीत व सांस्कृतिक कार्यक्रमात सहभाग घेतला. ढोल-ताशांचा गजर आणि देवीच्या जयघोषाने वातावरण दुमदुमून गेले. समारोप प्रसंगी डॉ. शिल्पा पाठक ठाकूर यांनी सर्व कार्यकर्ते, भाविक व मान्यवरांचे आभार मानले. त्यांनी सांगितले की, दुसऱ्या वर्षीही एवढ्या मोठ्या प्रमाणात मिळालेला प्रतिसाद अत्यंत समाधानकारक आहे. पुढील वर्षी अजून मोठ्या प्रमाणात आणि आकर्षक स्वरूपात दुर्गापूजा साजरी केली जाईल असे मनोगत त्यांनी व्यक्त केले.
0 Comments